Kapin P1M shabu nasakmit

CEBU, Philippines – Kapin sa usa ka milyon ka pesos nga kantidad sa shabu ang nasakmit sa mga sakop sa Provincial Intelligence Branch (PIB) sa Cebu Provincial Police Office gikan sa usa ka 53 anyos nga lalaki diha sa Hillside Bulacao, Dakbayan sa Talisay niadtong nakalabay nga gabii.

Ang dinakpan giila nga si Quintino Tagpuno Jr., nagpuyo sa maong dapit. Sumala pa ni Senior Superindent Clifford Gairanod, direktor sa CPPO nga taudtaod nang gipanid-an ang suspetsado nga usa ka level 2 drug pusher.

Napalitan kini og P500 nga usa ka paketeng gituohang shabu  ang suspek hinungdan sa pagsikop kaniya, nasakmit kaniya ang duha ka dagkong putos, tulo ka medium size ug 95 ka mga gagmay nga paketeng gituohang shabu nga mikantidad og P1,003,000.00.

Si Tagpuno nga nahinabi sa mga tigbalita miangkon nga namaligya kini og drugas apan ginagmay lang , wala niya angkona ang nakuha nga ebidensya.

Giangkon  ni Tagpuno nga nadakpan na kini kaniadto sa susamang kaso apan na-abswelto sa kaso.

Samtang lima ka tawo ang nasikop sa kapolisan sa managlahing buy-bust operation sa Dakbayan sa Lapu-Lapu nga mikabat og kapin sa P100,000.

Gidakop ang managtiayon nga si Mark ug Maricor Daño, residente sa Sitio Malinao, Brgy. Agus, lakip na ang subject sa operasyon nga si Joseph Igot, 33, nga giingong top 2 sa most wanted drug personality sa Marigondon Police Station.

Matud ni Police Inspector Alcon Escosura, hepe sa Marigondon Police Station nga ang mga suspetsado nasikop sa balay ni Mark Daño ug si Maricor naaktuhang namutos og shabu.

Nasakmit sa kapolisan ang upat ka medium size ug tulo ka gagmyang pakete sa shabu,  ug P700 nga gituohang halin sa drugas ug drug paraphernalia.

Samtang nadakpan sa mga sakop sa City Intelligence Branch  sa Sitio Kulo, Canjulao sila si Junjie Tampus, 24, ug Mark Anthony Doronillo, 32, ug kapin sa 200 ka gagmay’ng putos sa ginadiling shabu ang nasakmit kanila.

Nagkanayon si Senior Inspector Mark Gifter Sucalit, hepe sa LCPO-CIB nga nakuhaan si Tampus og usa ka .45 caliber pistol nga adunay unom ka bala ug drug paraphernalia.

Laing nadakpan ang usa ka Soledad Macan Sumagang ,55, sa Brgy. Bangbang, Lungsod sa Cordova ug nasakmitan og 22 ka gagmay’ng paketeng shabu.

Dugang nadakpan sa Brgy. Poblacion, Lungsod sa Sogod mao ang gidudahang pusher nga si Rino Cabucos, Brigoli, 25, ug nasakmitan og upat ka paketeng shabu ug buy-bust money.  Gidakop usab ang tulo nga sila si Ranil Rico Brigoli, 40,  Retchele Pornalles Montero, 31, ug Tomas Branzuela Mondero, 36, ug nasakmitan og mga pitsas sa mahjong. – Christell Fatima Tudtud ug Romeo T. Limpangog/EIM) (BANAT NEWS)