Magtiayong buta naluwas sa sunog

CEBU, Philippines - Mapasalamaton ang magtiayon nga buta sa ilang silingan nga nailhan lang nila sa ngalan nga “Brad Abing” nga nitabang kanila kay kung dili pa tungod niya hayan napaig na sila sa kayo nga nilamoy sa ilang balay sa niaging gabii sa Sitio Fatima, Barangay Apas, Dakbayan sa Sugbo.

Ang magtiayon nga Joaquin ug Basilides Acebo, pulos 62-anyos, lakip sa siyam ka pamilya nga nabiktima sa sunog sa lugar diin sagad sa namuyo mga buta.

Si Basilides ang wala kompleto nga nawagtangi sa iyang panan-aw ug makakita siya og gamay apan ang iyang bana nga si Joaquin dili gyud makakita.

Ang magtiayon ra ang nahabilin sa ilang balay tungod kay nagtrabaho man ang ilang anak niadtong higayuna.

Nisugilon si Basilides nga dihang nakabantay siya nga niulbo na ang kayo sa ilang silingan, iyang giguyod si Joaquin padulong sa likod nga bahin sa ilang balay.

Sa atubangan nga bahin niulbo ang kayo ug ang ilang luwas nga agianan mao na lang ang likod sa ilang balay.

Apan sa likod, atop sa ilang silingan nga balay ang ilang maagian ug iyang giingnan ang iyang bana nga manglayat sila sa balay sa ilang silingan.

Tuod nitugpa sila sa atop apan naligid sila sa bakilid ug nalukot-lukot padulong sa ubos.

Wala na matino sa magtiayon ang ilang natagakan ug ang ila na lang nabantayan nga gibunlot na sila sa ilang silingan nga si Brad Abing nga maoy niguyod nila aron sila maluwas.

Nabun-og ang ilang kalawasan, nakaangkon sila og garas ug samad sa ilang kamot, tiil ug bukton ug dali silang gitabang sa Emergency Medical Services.

Bisan pa man sa ilang makuyaw nga kasinati-an nagpabilin gihapon nga positibo ang magtiayon.

Labaw gyud nila nga gipasalamatan mao ang ilang silingan nga gitawag nila og “Brad Abing.” (BANAT NEWS)