Balay gituyo pagsunog sa anak sa tag-iya

CEBU, Philippines – Usa ka balay nasunog didto sa Sitio Locatha, Barangay Looc, dakbayan sa Lapu-Lapu kagahapon sa buntag ug ang nagpuyo sa kuwarto nga didto nagsugod ang sunog gidakop sa mga polis.

Ang gitanggong karon sa kapolisan ug gisukit-sukit mao si Frank Floyd, 23-anyos, nga anak ni Joel Casipong nga maoy tag-iya sa panimalay.

Gituohan nga giunay pagsunog ni Floyd ang kuwarto nga iyang giestaran tungod kay wala kini sa maayong panimuot ug gituohan nga “high” kaayo sa gidiling drugas.

Matud ni Fire Officer-1 Handji Samonte nga miulbo ang sunog mga alas 8:30 sa buntag didto sa kuwarto ni Floyd.

Adunay report nga may mga silingan sa mga Casipong nga nakakita nga gituyo sa pagsunog ni Floyd ang ilang balay. Sigun sa inpormasyon nga nag-wild si Floyd diha nga wala hatagi og kuwarta sa iyang inahan.

Sa imbestigasyon, si Floyd gikataho nga miangkon sa mga polis nga siya mogamit og gidili nga drugas. Bisan og mikabat lang og P150 mil ang kadaot sa sunog apan ang tag-iya sa panimalay nakahukom nga pasakaan niya’g kaso ang iyang anak. – /RUB) (BANAT NEWS)