IEC stamp gipagawas na

CEBU, Philippines – Mahimo na makakolekta ang mga stamp collectors sa commemorative stamps sa 51st International Eucharistic Congress nga ipahigayon karong Enero 24 hangtud 31 sa   Sugbo.

Kini human gipagawas na sa Philippine Postal Corporation ang 100,000 ka stamps sa tag usa ka peso ang usa.

Matud ni Rachel Betos, marketing officer sa Philpost-Central ug Eastern Visayas, nga gipangapod-apod na nila sa nagkadaiya’ng post offices ang IEC stamps.

Ang pagbuhat sa commemorative stamps kabahin sa ila’ng pagsuporta sa 51st IEC diin ang hulagway mao ang official logo sa Congress nga gidesinyo ni Jayson Jaluag, 15-anyos nga tinun-an sa Siyudad sa Mandaue.

Ang Philpost nihimo usab og commemorative stamps sa beatification ug canonization ni San Pedro Calungsod niadto’ng 2000 ug 2012.

Samtang gibutyag ni Bishop Dennis Villarojo, secretary-general sa IEC nga dili lang alang sa mga delegado ang kalihukan.

Matud niya nga sa Enero 24 ipahigayon ang opening mass alas 4:00 sa hapon sa Plaza Independencia nga bukas sa publiko.

Sa Enero 27 sa alas 4:00 sa hapon dunay misa sa 14 ka simbahan sa Archdiocese sa Sugbo diin ang mga delegado makig-interact sa mga parokyano.

Sa Enero 28 sa alas 7:00 sa gabii adunay Visita Iglesia sa pito ka simbahan nga gilangkuban sa Capitol Parish, Asilo dela Milagrosa, Redemptorist, Santo Rosario, Cathedral, Basilica Minore del Santo Niño de Cebu ug Sacred Heart.

Matud ni Villarojo nga ang kalihukan sama sa Huwebes Santo diin adunay adoration ug pagpangompisal.

Si Villarojo niawhag sa tanang parokya sa pagbisita sa nahisgutang mga simbahan atol sa Visita Iglesia.

Sa Enero 29 sa alas 4:00 sa hapon adunay ipahigayong misa atubangan sa Kapitolyo diin bukas usab kini sa publiko ug sa Enero 30 adunay misa sa Cebu City Sports Center nga tambungan sa mga first communicant uban sa ila’ng mga ginikanan ug mga delegado sa IEC.

Sa Enero 31 nga adlaw’ng Domingo wala’y misa ang tibuok Archdiocese sa Sugbo tungod kay ang tanan sa alas 4:00 sa hapon anha magtapok sa South Road Properties. (Decemay P. Padilla ug Brenda D. Batuto/GMR)(BANAT NEWS)