Ang pagbayad sa utang sa Japan usa ka pamolitika

CEBU, Philippines – Ang kanhi managing director sa Cebu Investment Promotion Center mihulagway nga pamolitika ang tinguha ni suspended Mayor Michael Rama nga hutdan pagbayad ang P2.4 Bilyones nga nahibiling utang sa dakbayan sa Japan kabahin sa pag-ugmad sa South Road Properties (SRP). Si Joel Mari Yu miingon nga sigurado siya nga ipasigarbo ni Rama nga siya ang nagbayad sa utang ni kanhi mayor Tomas Osmeña kun kahatagan og katumanan ang iyang tinguha.

Gitudlo ni Osmeña si Yu kaniadto aron maoy mangulo sa CIPC nga magsilbi nga marketing arm pagbaligya sa SRP, apan gitangtang si Yu sa katungdanan dihang si Rama na maoy mayor.

Gibutyag usab ni Yu nga barato ra ang pagbaligya ni Rama sa 45 hektareyas nga yuta sa SRP sa kantidad lang nga P38 mil kada metro kuwadrado, kay iyang gitandi nga mas mahal pa ang kantidad sa yuta sa SRP kay sa IT Park.

Matud ni Yu nga dili sayop ang pagbayad sa utang sa dakbayan didto sa Japan apan kinahanglan nga tan-awon unta kun unsa ang labing makahatag og kaayohan sa dakbayan.

Iyang sugyot mao nga ang Pond-A nga kasikbit ra sa SRP  gastohan og mga P5 bilyones aron mahimo nga laing reclamation project ug aduna kini gilapdon nga 60 hektareyas.

Apan si  Mayor Rama miingon nga mas nindot gyud nga bayaran ang utang kay aron wala nay problema pa ang dakbayan. Hangtod sa 2025, ang dakbayan magbayad og mga P500 milyones ngadto sa Japan. – /RUB) (BANAT NEWS)