Opisina sa langyaw nasunog

CEBU, Philippines – Gituohang problema sa kuryente ang hinungdan sa pag-ulbo sa sunog sa Barangay Guadalupe, Dakbayan sa Sugbo pasado alas 7 sa nakalabay nga gabii. Usa ka establesemento nga giabangan sa usa ka langyaw nga tighimo og fashion accessories ang naugdaw ug laing usa ka panimalay. Matud ni Senior Fire Officer 2 Emiliano Daño Jr., fire investigator nga nahinabi sa Banat News, nga nagsugod ang sunog sa opisina sa Blue Planet nga giabangan ni Richard Fourteau. Alas 7:32 nadawat ang alarma sa sunog ug sulod sa 20 minutos nakontrolar.

Sa inisyal nga imbestigasyon nasayran nga ang guwardiya ang nakabantay sa baga nga aso hinungdan nga nitawag kini og tabang sa kabomberuhan.

Nasayran usab ni Daño nga sa nakalabay nga adlaw wala’y tawo nga nakasulod sa mao’ng opisina diin sila nagtuo nga lagmit adunay wala napawong nga gamit nga de kuryente hinungdan nga kini nasunog.

Lakip sa gilamoy sa kayo ang usa ka balay nga nahimutang kilid sa establesemento.

Wala ra hinuon naglisud ang mga bombero sa pagresponde kay nahimutang ra man usab ang establesemento kilid sa karsada, apan ang kahinay sa supply sa fire hydrant sa lugar ang nasugatan nga problema. Kapin sa usa ka gatos ka libo ka pesos ang gibana-bana’ng danyos sa sunog. – /GMR) (BANAT NEWS)