Tungod sa tsinelas manghod gipatay sa maguwang

CEBU, Philippines – Patay ang usa ka lalaki  human gidunggab sa makadaghang higayon sa iyahang maguwang atubangan mismo sa haya sa ilang amahan sa Sitio Gaong-gaong, Brgy. Puting-bato bukiran nga bahin sa Dakbayan sa Toledo niadtong Martes sa buntag.

Si Orland Belsis, 27, nakaangkon og samad dinunggaban sa luyo nga bahin sa iyang lawas human gidunggab sa iyang maguwang nga si Marlon,33, pulos  nagpuyo sa nahisgutang dapit.

Sa gihimong imbestigasyon sa kapulisan, nangaon ang duha og pamahaw niadtong tungora human nga nagbilar sa haya sa ilang amahan.

Naglibog pa karon ang kapolisan kun unsa gyuy bug-at nga rason nganong kalit nga gidunggab sa suspek ang igsuon samtang silang duha nangaon. Apan base sa nakuha nilang impormasyon, pwerteng sukoa sa suspek ngadto sa manghod kay gihimong haling sa pugon sa naulahi ang karaan niining tsinelas.

Daling gitabang ang biktima ug gidala sa tambalanan sa Dakbayan sa Sugbo apan nakabsan kini sa iyang kinabuhi. Ang suspek nasikop usab sa kapulisan human sa maong hitabo ug anha sa prisohan niini sugaton ang Bag-ong Tuig. – /EIM) (BANAT NEWS)