Gipatay kay gidudahang asset

CEBU, Philippines - Naligo na sa iyang kaugalingong dugo ug adunay samad pinusilan sa nawong ug wala na’y kinabuhi dihang nakit-an sulod sa balay ang usa ka 19 anyos nga babaye nga gituohang gipatay gumikan kay gidudahang asset sa kapulisan.

Giila ang biktima nga si Angelie Lañojan, adunay kapuyo ug nag-abang sa usa ka lawak diha sa Barangay Pugalo sa Lungsod sa Alcoy.

Matud pa ni Police Officer 2 Erland Salonoy sa Alcoy Police nga nahinabi sa Banat News nadakpan nila sa miaging semana ang kapuyo sa biktima nga si Gullas Junamil tungod sa pagpamaligya og ginadiling drugas, apan adto hitaboa, nakaipsot si Lañojan.

Si Salonoy mitug-an nga ila usab nahibaw-an nga ang duha nagpuyo kaniadto sa Dalaguete ug gironda usab sa Dalaguete Police apan ang nadakpan mao ang igsuon ni Junamil samtang silang duha nakasibat.

Nagduda si Salonoy nga malagmit nga gidudahan sa mga kauban sa grupo ni Junamil nga  police asset sa kapulisan si Lañojan kay nganong wala man kini nadakpan sa duha na ka higayon nga pagpangronda apan ang managsuong Junamil ang nasikop.

Niadtong nakalabay nga gabii gisulod diha sa iyang lawak ang biktima ug gipusil kini samtang natulog.

Gituohan usab nga nigamit og silencer sa iyang armas ang kriminal kay walay nakadungog og buto sa armas nianang gabhiuna.

Usa ka basiyo sa bala sa kalibre .45 ang nakuha sa kapulisan sa crime scene ug  pasado na alas 8 sa buntag kini nadiskobrehan sa iyang mga silingan sulod sa lawak.

Apan giklaro ni Salonoy nga dili police informant si Lañojan. Matud niya nga tiggamitan lang og drugas ang babaye ug wala nalambigit sa pagpamaligya.

“Kadtong iyang ka live-in ang namaligya kini siya tiggamitan ra ni siya sa nakuha namo nga info, lagmit ba nagtuo ‘tong mga kauban ni Junamil nga asset ni siya maong gibirahan kay wala man gyu’y nakita namo nga duol-duol nga anggulo, di gyod namo ni siya asset,” matud pa ni Salonoy. (Jojo C. Ugdol/EIM)(BANAT NEWS)