Style sa labni sa srp niuso sa Talisay

CEBU, Philippines - Gilabnihan sa iya’ng bag ang usa ka call center agent samtang naglakaw sa Miami Homes, San Isidro, Dakbayan sa Talisay kagahapon sa kadlawon.

Ang biktima nailhan nga si Amhyville Ann Ibona, 34 anyos nga lumad nga taga Cagayan de Oro City ug nagpuyo sa nahisgutang lugar, ang dali nga nakapangayo og tabang sa kapolisan.

Matud ni PO1 John Xyros Ilustrisimo nga naglakaw ang biktima ug gilabyan sa duha ka lalaki nga nagsakay og motorsiklo.

Ang duha nibalik ug nilabni sa bag sa biktima nga adunay sulod nga importante’ng mga butang lakip na ang iya’ng kwarta nga P4,200.

Si Ibona ang wala na’y nahimo gawas sa pagsumbong na lang sa iya’ng nahiaguman sa kapolisan.

Sa nasayran, ang estilo sa paghimo sa krimen mao sab ang estilo nga gigamit sa duha ka suspek nga nilabni og bag sa biktima nga nagsakay og motorsiklo sa South Road Properties sa Barangay San Roque sa nilabay nga buwan.

Ang pagpanglabni niresulta sa pagkatumba sa motor nga gisakyan sa biktima ug pagkamatay sa drayber niini. (Gabriel C. Bonjoc/GMR)(BANAT NEWS)