Mama, anak naligsan patay

CEBU, Philippines - Patay ang 36 anyos nga  inahan ug ang 4 anyos niini nga anak nga lalaki dihang sila naligsan og dumptruck diha sa dalan Maguikay, Dakbayan sa Mandaue kagahapon sa buntag.

Ang imbestigador sa Mandaue City Police Office (MCPO)  traffic division nga si Police Officer 2 Rommel Dayon miila sa duha nga mao sila si Jenalyn Bascones Estenzo nga usa ka fruit vendor ug  iyang anak nga si Jay, pulos nagpuyo sa Sitio  Calderohan sa Barangay Cabancalan sa maong dakbayan.

Ang duha naligsan sa ligid ug naungot sa ilawom maong gigamitan pa kini og heavy-duty jack sa mga sakop sa Emergency Rescue Unit Foundation (ERUF) aron lang sila makuha ug gidala sa Mandaue City Hospital apan gideklarar ang duha nga patay          na. 

Giimbestigar karon sa kapolisan ang drayber nga si Anastacio Hermada, 49, taga Cantao-an, Dakbayan sa Naga.

Si Hermada nga nahinabi sa Banat News miingon nga gikan pa sila sa iyang anak nga si Christian sa Barangay Tingub naghatod og bas ug sa pag-abot nila sa nahitaboan, kalit lang adunay van nga nigawas gikan sa usa ka dakong tindahan ug iyaha kining gihunongan aron makalahos.

Apan sa pag-abante niya, kalit siyang nakabantay nga miuntol iyang sakyanan ug nakita niya ang pagdinaganay sa mga tawo nga nagmando kaniya sa paghunong kay aduna kini naligsan.

Matud pa ni Hermada nga wala gayod siya manaog sa gimaneho niyang dump truck  sa kahadlok nga tabangan sa mga estambay nga pwerteng sukoa kaniya.

Migawas na lamang sila sa iyang anak dihang aduna nay mga polis. Matud pa niya wala gayod niya nabantayan nga nagsunod sa van ang mga biktima paglabang sa karsada hinungdan nga iyang naligsan.

Si Glenn Antigua, executive officer sa Traffic Enforcement Agency of Mandaue (TEAM) nagkanayon nga ang pipila nga nakasaksi ang miingon nga midagan ang bata labang sa karsada ug gigukod kini sa inahan maong naligsan silang duha.

Ang bana sa mga biktima nga si Agustin Estenzo nga nahinabi sa Banat News miingon nga naninda og lansones ang iyang asawa  sa sidewalk sa maong dapit ug kanunay na kuyogon ang ilang anak kay wa may mabinlan sa bata kay siya nagtrabaho sa usa ka pabrika. (BANAT NEWS)