Pito natabunan
CEBU, Philippines - Pito ka mga tawo ang naangol human natabunan sa kongkretong bungbong sa usa ka balay sa dihang kini nahugno kay naatrasan sa usa ka awto diha sa Sitio Pungtod, Barangay Mambaling kagahapon sa alas 4:22 sa hapon.
Duha sa mga biktima ang mga bata nga nag- edad 5 ug 2 anyos nga gipangdala sa Cebu City Medical Center (CCMC).
Ang impormasyon gipaabot ni Konsehal Dave Tumulak nga nahinabi sa Banat News kinsa miila sa mga naangol mao sila si Amora Sulpicio, 25, Florencio Magtagad, 48, Real Genesis Magtagad, 2, Donino Ocarol, 11, John Lloyd Montanez, 5, Marlito Golo, 20, ug ang drayber sa awto nga si Alex Aleonar.
Gawas sa unom adunay usa ka Badjao ang gikatahong naangol usab apan dali ra usab kini nga milakaw human sa hitabo.
Duna’y gikatahong nagrabehan sa maong hitabo apan kini padayon pa nga gisubay sa kapulisan.
Sumala pa ni Tumulak nga ang drayber sa Toyota Vios nga si Aleonar nagpuyo ra sab sa maong dapit mao karon ang usa sa talandugon ang kahimtang human giatake sa sakit ug gikatahong naghuot ang dughan.
Matud pa ni Tumulak nga gikan sa usa ka shop ang naasoy nga sakyanan apan sa iyang paggawas nga nag-atras didto kini midiretso og sampak sa balay ni Teofila Paslon.
Ang tag iya tayming nga wala sa maong balay atol sa hitabo, apan adunay mga tawo ug mga bata nga biktima sa sunog nga nagestambay kilid sa balay nga mao’y natabunan sa nahugno nga sementong bungbong.
“Kanang balay nga naatrasan duol ra kaayo na sa nasunogan,” matud pa sa text message nga gipaabot ni Tumulak gikan sa mga rescuers.
Sa pakighinabi sa Banat News ni Hector Arcenal, based control operator sa Cebu City Transportation Office (CCTO) kini mikompirmar nga posibling giatake sa sakit ang drayber sa sakyanan hinungdan nga nayatakan niini ang gasolinador ug nabangga sa koral sa balay.
Ang mga sakop sa Cebu City Emergency Medical Services ug Emergency Rescue Unit Foundation dali nga mitabang sa mga biktima.
Gawas sa mga naangol tulo usab ka trisikad ug usa ka gate sa laing balay ang nadanyos. (BANAT NEWS)
- Latest
