Spaghetti wires panghipuson

CEBU, Philippines – Nagkasinabot ang mga telecommunications companies ug utility companies nga panangtangon ug panghipuson ang mga poste ug mga kable sa kuryente ug telepono nga wala nay gamit ug kadtong samok tan-awon.

Kini maoy ilang aksyon human sa nahitabo sa Barangay Tinago diin usa ka bata ang namatay human nasabod ang usa ka trak sa nagyungyong nga linya gikan sa poste ug ang poste natumba sa bata.

Matud ni Visayan Electric Company Valentin Saludes III nga tangtangon na ang tanang mga kahoy nga poste sa mga telcos ug ilisan kini og concrete poles ug didto usahon og tapot ang tanang kable sa kuryente ug sa telepono.

Kini human namatikdan nga adunay mga eskina nga daghan kaayong mga poste nga nagbarog ug samok tan-awon ilang mga wires ug kable ug nakaali usab sa agianan sa tawo.

Si Mayor Michael Rama daan nang mimando sa pagpahipos niining gitawag nga mga “spaghetti wires” nga gawas nga ngil-ad tan-awon, peligro nga masabod ang mga sakyanan ug mangatumba ang poste.

Si Edllin Delos Reyes sa Globe Telecoms nagkanayon nga nagpadayon ang ilang programa pag-ilis sa mga kahoy nga poste nga gipanag-iya kaniadto sa Isla Communication Inc. (Islacom) nga ilaha nang napalit.

Samtang si Cayetano Cruz sa Philippine Long Distance Telephone Company (PLDT) nitug-an nga gipanangtang na nila ilang mga poste ug ilaha na lang sabotan sa VECO ang pagsab-it sa ilang mga kable diha sa poste niini. Nasabotan usab nila nga kun ugaling adunay poste nga matumba diha sa dalan, gihatagan nila og pagtugot ang VECO nga moputol niini ug sa kable aron wa nay madisgrasya pa inay nga paabuton kun kinsay tag-iya niini. Giuna karon paglimpyo ang mga poste sa Sinulog Route gikan sa Osmeña Blvd.  paingon sa Fuente Rotunda ug ang gikan sa Fuente paingon sa Escario Avenue.

Ang paglagda sa kasabotan gitambongan sa mga representante sa Cebu Catholic Televison Network (CCTN), PLDT, Globe, TelPhil, Skycable, Eastern Telcom, TelecPhil, ug Smart Communications. – /EIM) (BANAT NEWS)