Mga terminal susihon sa LTFRB

CEBU, Philippines - Ang mga bus terminal dinhi sa Sugbo susihon sa kadagkoan sa Land Transportation Franchising and Regulatory Board (LTFRB)-7 karong sunod semana aron sutaon kun andam na ba kini sa nagsingabot nga adlaw sa mga santos ug adlaw sa mga kalag.

Matud ni LTFRB-7 acting regional director Rey Elnar nga tumong nila nga masiguro ang kahapsay ug kaluwasan sa mga pasahero nga mopauli sa lainlaing dapit sa kalungsuran.

Si Elnar miingon nga ang LTFRB personnel morekomendar sa management sa terminal nga tagdon kun adunay makita nga kakuwangan.

Mga sakop sa LTFRB ipangdestino sa mga bus terminal karong Oktubre 30 ug 31 aron modawat sa reklamo gikan sa publiko.

Susihon sa mga LTFRB personnel kun kompleto ba ang papeles sa mga bus nga mobiyahe ug moisyu usab sila og special permit niadtong   mobiyahe sa laing rota.

Ang sagad g’yud problema panahon sa adlaw sa mga santos ug adlaw sa mga kalag mao ang kakuwang sa mga sakyanan.

Si Elnar miawhag sa katawhan nga unta mosayo pag-uli sa ilang dapit sa probinsya aron dili sila magdasok sa Oktubre 31.

Giawhag ang mga drayber sa bus nga likayan gayud ang pagpasakay og subra sa gitugot kanila nga pasahero.

Sa laing bahin, ang PROBE Team sa dakbayan sa Sugbo miawhag sa mga maninda og buwak, kandila ug makaon duol sa mga sam-ang nga paninguhaon nila nga dili sila makababag sa agianan sa mga tawo.

Mga traffic enforcers sa Cebu City Transportation Office (CCTO) ipakatap usab sa palibot sa mga sam-ang.  (BANAT NEWS)