Topnotcher sa MELE preparado sa exam

CEBU, Philippines – Gidepensahan ug gipakagamay lang sa University of Cebu ang mga alegasyon kalabot sa giingong nahitabong “cheating” sa bag-ohay lang natapos nga Mechanical Engineering Licensure Examination niadtong buwan sa Septiyembre diin nahimong Top 1 ang usa sa mga tinun-an sa University of Cebu.

Ang nag Top 1 sa ME Licensure Examination mao si Micah Arceño, 21, lumad nga taga Catbalogan, Samar.

Isip pahalipay sa naangkon niining kalampusan, mismo si Atty. Augusto Go, Presidente sa UC ang nangunay sa pagtunol sa brand new nga sakyanan kang Arceño.

Adunay migawas nga report nga matud pa may nahitabong pagpangopya  atol sa eksaminasyon ug gani nag-viral pa kini sa social networking sites dihang adunay mga estudyanteng nikuha sa pasulit ang nangangkong nangopya.

Apan si Arceño misalikway niini kay matud niya siya naninguha ug nangandam og maayo sa maong pasulit.

Matud niya, wala siya magpaapektar sa maong alegasyon kay nasayod siyang iyang nakuha ang maong kalampusan pinaagi sa iyang paningkamot ug dili sa pagpangopya dili sama sa uban nga naghimo sa maong estorya.

“I think ila na kana, I answered the questions honestly and correctly,” matud ni Arceño sa mga tigbalita.

Ang mga magtutudlo ni Arceño sa UC nga maoy naggiya kaniya daw may kasagmuyo sa mga naghimo-himo og akusasyon. Si Arceño valedictorian sa high school,  usa siya sa UC Achievers ug kanunay kining top 1 sa mga gipahigayong quiz bowls.

Matud ni Engr. Rodel Naval, usa sa mga magtutudlo ni Arceño sa Mechanical Engineering daan na siyang nasayod nga makapasar si Arceño sa pasulit.

Gihulagway niya ang nanggawas nga pasangil mugna lamang sa mga mikuha sa pasulit nga nangahagbong.

Samtang si Atty. Go midepensa usab kang Arceño kinsa nailhan niyang ilang representante sa mga kompetisyon sama sa quiz bowls gikan sa local, regional ug national ug pirme kining mo-top mao nga di na angay ikatingala nga mag-top 1 kini sa MELE.

“In all the quiz bowl sponsored by the local, regional even national na top na gyud siya, unya sa examination na top moingon sila nga cheating tinunto na kana,” matud ni Atty. Go. Migradwar si Arceño sa UC nga Magna Cum Laude, diin usa siya sa 2,136 nga mikuha sa Mechanical Engineering Licensure Examination. - /EIM) (BANAT NEWS)