Gilugos, gipusil buhi; suspek nailhan
CEBU, Philippines - Gipasakaan og kaso’ng rape ug frustrated murder ang suspek sa lugos ug pagpusil sa 49-anyos nga babaye sa Sta. Cruz, Liloan alas 5 pasado niadto’ng Martes sa hapon.
Si Police Officer 3 Jesson Gayo sa Liloan Police Station niila sa suspek nga si Junjun Layaguin, 26, ulitawo nga taga Kalawisan, dakbayan sa Lapu-Lapu ug nagtrabaho isip caretaker sa luna.
Matud ni Gayo nga gikan pa nga nangompra sa merkado ang babaye ug gitionan kini og armas sa suspek.
Ang ginang wala na nakalihok sa pagtion og armas ug mao’y gihimo sa suspek ang pagguyod sa biktima sa labong nga kasagbutan ug didto nilampos gyud sa gihimo nga pagpanglugos.
Tuyo sa pagtago sa krimen, gipusil sa suspek ang agtang sa biktima gamit ang kalibre .357.
Si Gayo niingon nga nagtuo ang suspek nga patay na ang biktima hinungdan nga nagdali kini og pauli sa gipuy-an nga daw wala’y nahitabo.
Ang biktima natapsingan lang sa agtang hinungdan nga nakapangayo og panabang sa mga barangay tanod nga maoy nakapahibalo sa buhatan sa kapolisan.
Diha’ng gisukit-sukit ang biktima, kini nakatug-an nga usa ka Junjun ang naglugos kaniya.
Matud ni Gayo nga dali nila’ng giadto ang gipuy-an sa suspek ug naabtan nga naghigda-higda nga ila’ng namatikdan nga nakainom og ilimnong makahubog. Nasakmit gikan sa suspek ang holster sa armas ug mga bala sa .357 apan wala na nila igkita ang armas nga gigamit sa krimen. (BANAT NEWS)
- Latest
