Kaluha, idlas nga pusher nadakpan

CEBU, Philippines - Nadakpan na gyud sa kataposan sa kapolisan ang gipasanginlang dangog nga drug pusher sa Sitio SapaSapa, barangay Subangdaku  sa dakbayan sa Mandaue sa miaging gabii.

Si Senior Police Officer 1 Michael Limalima sa Presinto 4 sa Mandaue City Police Office (MCPO) miila sa nadakpan mao si Alex Gabato Labitan, 38, taga barangayTalavera, sa dakbayan sa Toledo apan temporaryong nagpuyo sa maong    dapit.

Ang operasyon gipangulohan ni Senior Inspector Miguel Bolalaque Andesa human sa pipila ka adlaw nga pagpaniid sa lugar.

Matud pa makadaghang higayon na nilang gisuwayan kaniadto nga dakpon sa akto nga namaligya og drugas ang suspek apan kanunay kining makabantay ug makaeskapo, hangtud sa nalipat kini niadtong adlawa.

Nasakmit gikan sa maong suspetsado ang 11 ka paketeng gidudahang shabu nga nagkantidad og P200 matag usa, 20 ka mga tinfoil ug ingon man ang buy-bust money nga gigamit sa pagpalit sa kapolisan .

Sa laing bahin, kaluha nga gipasanginlang namaligya og shabu nasikop sa mga polis human sa usa ka buy-bust operation niadtong Biyernes sa hapon sa barangay Tangil sa lungsod sa Dumanjug.

Ang nasikop mao si Louies ug Louie Galeos, 23, molupyo sa nahisgotang lugar human sa gipahigayong operasyon nila ni Senior Inspector Jose Rovic Villarin.

Ang grupo ni PO2 Danny Camero mipalit og upat ka pakete nga shabu nga mobalor og P400 gikan sa kaluha ug human natunol ang drugas gisikop dayon sila.

Matud pa nga ang kaluha nalakip na sa listahan sa illegal drug personalities sa lungsod.  (BANAT NEWS)