Manhunt sa nagpatay kang Alegre gisugdan na

CEBU, Philippines - Gisugdan na sa kapolisan ang manhunt operation sa nagbanhig patay kang Atty. Amelie Ocañada-Alegre nga niangol usab kang Atty. Briccio Joseph Boholst ug sa kauban nga si Antonio Pino.

Si Senior Superintendent Mariano Natuel Jr., direktor sa Mandaue City Police Office, niingon nga duha ka tawo ang giila sa mga saksi nga nagpaatbang sa buhatan ni Alegre sulod sa duha ka semana sa wala pa ang insidente. Nabantayan ang duha ka lalaki nga nagsakay og motorsiklo sa barangay Tipolo sa mao’ng dakbayan diin nahimutang ang buhatan sa abogada. Namatikdan ang duha ka lalaki nga nagsugod sa pagtumaw sa mao’ng dapit sa buntag ug mobiya inig ka hapon sa higayun nga mobiya na si Alegre sa iya’ng buhatan.

Gitataw ni Natuel nga upat ka anggulo ang ila’ng gipalawman sa imbestigasyon nga ang duha mao ang annulment case sa iya’ng bana ug ang pagkatangtang sa kawani sa iya’ng buhatan. Dugang ni Natuel nga aduna pa’y laing duha ka anggulo nga ila’ng gihimoan og imbestigasyon apan nagdumili siya sa pagbutyag niini.

Gihangop ni Natuel ang paghimo usab og buwag nga imbestigasyon sa National Bureau of Investigation sa dinalian nga kasulbaran sa kaso.

Naglakip sa mga lakang nga gihimo sa NBI kagahapon mao ang ila’ng pagpahigayun og ocular inspection sa crime scene ug paghipos og mga kasayuran sa mao’ng hitabo gikan sa mga molupyo sa lugar. (BANAT NEWS)