JVR kapusilon na sa mangubkubay
CEBU, Philippines - Nisaka ang dugo ni Talisay City Mayor Johnny V. Delos Reyes sa paggara sa mga mangubkubay og bas sa sapa sa Mananga bisan daghan na ang nadakpan ug nakamulta.
Matud ni Delos Reyes nga kung dili pa lang sala ang pagpamusil dugay na niya’ng gibuhat.
Si Delos Reyes ang gibasol sa nagkadaghan nga mangubkob sa bas nga nakahatag og peligro sa taytayan sa Mananga nga matumpag sa kadugayan.
Giklaro sa mayor nga gitugutan lang niadto ang pagpangubkob sa bas ibabaw nga bahin sa sapa sa habig sa Campo 4 sanglit mao kini ang panginabuhi sa katawhan.
Gani gimanduan na ni Delos Reyes ang Mananga Task Force ug kapolisan sa pagsikop sa mga mangubkubay nga wala’y permit.
Bahad ni Delos Reyes sa mga gahi og ulo nga dili na pasayluon tungod kay gihatagan na niya og pabor nga manguha og bas sa habig sa Campo 4. (Renan Alangilan/GMR)(BANAT NEWS)
- Latest
