Kahimtang sa mga tinun-an di maayo–DepEd
CEBU, Philippines - Naapektahan g’yud ang klase sa mga bata sa Cebu City Central School base kini sa obserbasyon sa kadagkuan sa Department of Education Cebu City human sila nakadungog sa reklamo sa mga ginikanan labot sa sitwasyon sa mga tinun-an sa Grade 1 ug 2 nga sa gawas na nagklase kay giokupar sa mga nasunogan sa Sambag 1 ang 14 nila ka classrooms.
Nakita sa DepEd Cebu City nga dili g’yud “conducive for learning” ang mga tolda nga gihimong temporary classrooms diha sa quadrangle sa tunghaan tungod kay pwerte sabaa ug di magdungog ang mga bata ug maestra.
Matud ni Rhea Mar Angtud, Schools Division Superintendent duna karoy ipatumang emergency classes nga gisugdan kagahapon subay sa sugyot sa prinsipal nga si Lyra Illaga. Imbes alas-8 sa buntag magsugod ang klase sa mga tinun-an sa Grade 1 ug 2 gisibog kini sa alas-6 sa buntag hangtod na sa alas-12 sa udto, mahulog nga ‘half-day’ lang ilang klase.
Samtang ang ikaduhang batch mosulod og alas-12 sa udto ug mamauli og alas- 6 sa gabii. Matud ni Angtud apektado gyud ang klase sa mga bata kay gawas sa sakripisyo nga momata og sayo, mubo ra kaayo ang oras sa klase. Dugang ni Angtud,mas maayong adunay laing kabutangan sa mga biktima sa bisan unsang kalamidad ug dili gamiton ang mga tunghaan isip evacuation centers. (BANAT NEWS)
- Latest
