50 pakete sa shabu sakmit, 5 nadakpan

CEBU, Philippines – Nasakmit sa kapolisan ang 48 ka putos sa drugas sa managlahi’ng buy-bust operation sa dakbayan sa Lapu-Lapu.

Si Senior Inspector Verniño Noserale, hepe sa City Intelligence Branch ug City Anti-Illegal Drugs Special Operations Task Group sa Lapu-Lapu City Police Office, niila sa mga suspek nga sila si Noli Ompad, 36, taga sitio Bukid-Bukid, Pajac ug si Alexander Soliano, taga sitio Buyong, Maribago.

Nakuhaan og 11 ka pakete si Ompad alas 12:20 sa udto niadto’ng Domingo samtang nakuhaan og 37 ka putos si Soliano alas 9:45 sa Biyernes sa gabii.

Laing nasakmit sa kapolisan gikan kang Ompad ang usa ka unit sa cellphone, drug paraphernalia ug P510 nga gituohang halin sa transaksiyon.

Si Noserale nagkanayun nga si Ompad usa sa "top 10 priority drug personality" sa Mactan Police Station 2.

Na-recover sab sa kapolisan kang Soliano ang usa ka puwa nga motorsiklo nga adunay temporary plate number #130106.

Samtang nadakpan ang tulo ka tawo nga naghupot og shabu sa managlahi’ng takna nga operasyon sa kapolisan sa dakbayan sa Mandaue ug lungsod sa Consolacion niadto’ng Domingo.

Si Senior Police Officer 1 Francisco Perez Jr. sa Consolacion Police Station niila sa duha ka dinakpan nga sila si Marvin Sanchez Baliguat, 24 ug Jerome Quico Lumawag, 25, nga taga barangay Pitogo sa mao’ng lungsod.

Nagpatrolya sila si PO1 Dennis Pepito ug PO1 Ernie Barba alas 7 pasado sa gabii niadto’ng Domingo sa barangay Tugbongan diha’ng may nanagan nga mga lalaki nga nakakita sa patrol car.

Nanganaug sa patrol car sila si Pepito ug Barba ug gigukod ang mga lalaki ug ila’ng naapsan sila si Baliguat ug Lumawag.

Sa pagrekisa sa mga bulsa mao’y nakuha ang tagsa ka gagmay nga pakete’ng shabu hinungdan nga sila gidakop.

Usa ka Celso Sabate, 47- anyos, minyo nga taga Mantuyong, dakbayan sa Mandaue ang gidakop usab alas 7 pasado sa niagi’ng Domingo sa  gabii.

Si Police Officer 2 Jesson Flores sa Mandaue City Police Office niingon nga nagpatrolya sila sa nahisgutang dapit ug si Sabate  nga namatikdan ang kadudahan nga lihok ang girekisa ug nakuhaan og usa ka pakete’ng shabu. – /GMR) (BANAT NEWS)