3rd Mandaue-Mactan bridge gitun-an

CEBU, Philippines - Gipangandaman sa kagamhanan sa dakbayan sa Mandaue ang gitinguha’ng pagtukod sa ika-tulo’ng taytayan nga magdugtong sa dakbayan sa Lapu-Lapu.

Si Architect Florentino Nimor, City Planning Officer sa Mandaue niingon nga kasamtangan karon nila’ng gihimo ang pagpalambo sa mga dalan sa pagpahaum sa giplano nga Automated Guide Rail (AGR) transport isip kabahin sa plano sa Japan International Cooperation Agency.

Matud ni Nimor nga ang JICA kasamtangan na karon nga naghimo sa ilang pagpangandam pinaagi sa pag-ila sa mga luna nga maigo sa gitinguha nila’ng proyekto.

Si Nimor nipasabot nga ang AGT maoy usa sa mga pamaagi sa pagsulbad sa naghuot nga mga sakyanan pinaagi sa mass transit services alang sa paspas nga pagbiyahe.

Ang ikatulo’ng taytayan manukad sa habig dapit sa Cansaga Bridge paingon duol sa tugpahanan sa Mactan.

Si Assistant City Engineer Andres Suson niingon nga ubos sa maong proyekto, nigahin ang kagamhanan sa dakbayan og P5.4 milyones sa pagpalapad sa kanal sa dalan B. Suico nga molungtad sa 90 ka adlaw nga kaugmaran.  (BANAT NEWS)