‘Kabit’ patay, misis grabe

CEBU, Philippines – Patay ang usa ka lalaki ug kritikal ang kahimtang sa usa ka babaye human kini gipamusil sa bana  sa babaye human sila nakit-an nga nagkuyog paingon sulod sa usa ka KTV bar sa Sitio Banawa Barangay Guadalupe ning dakbayan sa miaging kaadlawon.

Ang namatay naila nga si Perceval Casas, 41, minyo, wala’y trabaho ug   kritikal ang asawa sa suspetsado nga si Catherine Bersales, 32.

Ang suspetsado mao si Kenneth Bersales, 34, sakop sa Lapu-Lapu Security Agency ug nadestino sa Sapphire Distributors duol sa KTV bar diin niya nakita ang asawa ug si Casas nanulod.

Matud pa ni Senior Police Officer 2 Rommel Bangcog ang imbestigador sa Homicide Section sa Cebu City Police Office nga nahinabi sa Banat News nga mag-usa na ka tuig wa mag-ipon ang magtiayon kay magsige og away.

Sumala pa sa bana   nga pirme niining masakpan ang asawa nga dunay lalaki nga ka text hangtud milayas kini sa ila ug gibiyaan ang tulo nila ka anak.

Nagduda siya nga si Casas ug iyang asawa adunay relasyon.

Apan si Bangcog wa mokompirmar sa pasangil sa suspek tungod kay wala may makaestorya sa mga biktima.

Apan ang amiga ni Catherine nga nahinabi sa kapulisan mitug-an nga milakaw ang iyang  amiga kay dapatan kini sa iyang bana.

Matud pa nga diha pa sa atubangan sa suspek mihunong ang motorsiklo sa mga biktima sa dayon nilang panulod sa D Voice KTV Bar hinungdan nga iya kini nga giduol sa sud ug gitagsatagsa og pusil sa ulo.

Nakuha sa security camera ang krimen diin gipatiran pa sa suspek si Casas ug gidiretso pagpusil sa nawong niini ug gisunod pagpusil ang nagkisikisi niya nga asawa diha sa ulo.

Matud pa ni Bangcog posibling wala nasayod ang duha nga diha ra sa duol nagbantay ang bana sa babaye.

Gitabang sa taga Emergency Rescue Unit Foundation (ERUF) ang duha apan namatay si Casas samtang kritikal sa tambalanan ang babaye.

Ang suspek nadakpan sa mirespondeng mga polis ug gi-turnover ang iyang .38 revolver nga duna’y duha ka basiyo, duha ka bala ug usa ang wala nakabuto.

Gitanggong na sa karsel sa Guadalupe Police detention cell ang suspetsado nga pasakaan og kasong murder ug frustrated parricide. – /EIM) (BANAT NEWS)