Namusil tungod sa lalis sa yuta
CEBU, Philippines - Nakaangkon og samad pinusilan ang usa ka lalaki human gipusil sa iyang silingan tungod sa away sa yuta sa barangay Dumlog, dakbayan sa Toledo.
Si Rommel Labrador, 19, ang nakaangkon og samad pinusilan human gipusil ni Rolando Nable, 43, tindero og ice drop ug pareho’ng nagpuyo sa nahisgutang lugar.
Sila si SPO3 Henry Acosta kauban nila ni SPO2 Jemelon Cotmaya, PO3 Arvn Gesite ug PO1 Ivan Cavellida ang niresponde sa maong pagpamusil. Base sa imbestigasyon nga sulod sa panimalay ang biktima samtang sa gawas ang suspek dihang naghisgut kalabot sa yuta hangtud niabot sa punto nga nagkabinayloay og hait nga pulong.
Gipusil sa suspek ang biktima gamit ang wala matino nga kalibre sa armas ug naigo ang biktima sa iyang abaga.
Ang suspek dali nga nisibat samtang ang biktima gidala sa Toledo City Hospital. (BANAT NEWS)
- Latest
