Seguridad sa malls pahugtan
CEBU, Philippines - Gimandoan sa hepe sa Regional Intelligence Division sa Police Regional Office 7 nga makig-alayon ang tanang mga hepe sa kapolisan sa mga tagdumala sa mga malls ug sa mga tagdumala sa seguridad niini tungod sa pagsugwak unya sa mga tawo nunot na sa kasaulogan sa Pasko.
Si Senior Superintendent Pablo Labra II miingon nga kinahanglang pahugtan pa ang seguridad sa mga malls karong buwana.
Matud pa nga mosugwak g’yud ug maghugop ang mga tawo sa mga malls aron mamalit og mga pinaskohan ug mga andamonon sa Pasko ug sa Bag-ong Tuig.
Tungod niini, mosaka ‘sab ang gidaghanon sa krimen niining buwana mao nga angay nga hugtan pa ang seguridad.
Sagad niini mga mangingilad ug mga manguguot nga mobiktima sa mga tawo nga mokompiyansa sa ilang mga gamit.
Gipahinumduman ni Labra ang mga security providers sa mga malls nga pahugtan pa ang seguridad.
Giawhag usab ni Labra ang mga malls nga sa matag karon ug unya pahinumduman ang publiko nga magbantay sa ilang mga butang samtang diha sila sa malls. (BANAT NEWS)
- Latest
