Nanulis duol sa CCPO gisundan
CEBU, Philippines - May gisundan na nga suspek ang kapolisan sa pagpanulis sa usa ka convenient store duol sa Cebu City Police Office headquarters niadtong nakalabay nga adlaw.
Matud ni Chief Insp. Wildemar Tiu, hepe sa Fuente Police, nga bisan nag-helmet ang tulisan base sa kuha sa close circuit television (CCTV) camera, ilang nakuha ang porma sa nawong, ilong ug sa pamayhon.
Sa pagpakig-alayon sa Theft and Robbery Section sa CCPO, dunay nakuha nga impormasyon ang kapolisan nga mitukma sa nakuha nila nga hulagway sa video. Sigun pa ni Tiu nga bag-ohay lang nagsugod sa pagpanulis ang suspek apan dili pa makatug-an kun kini konektado ba sa ubang grupo sa mga tulisan.
“Delikado og dili mabadlong basin mogara, bata pa ni, kini gyud siya maoy mition og armas sa cashier,” sigun pa ni Tiu.
Ganti nga P5,000 ang giandam nga ganti sa kapolisan sa makahatag og impormasyon sa nahimutangan sa suspek.
Matud ni Tiu nga ang maong kwarta gikan sa mga nagpakabana nga katawhan nga gusto nga motabang sa pag-ila sa tulisan. (BANAT NEWS)
- Latest
