500 ka seniors nipirma sa manifesto

CEBU, Philippines - Gibana-banang 500 ka mga senior citizens na ang nipirma sa manifesto isip pagtugot nga ihatag ang P2,000 nga bahin sa ilang cash assistance alang sa pagpatukod sa Cebu City Medical Center (CCMC).

Matud sa pangulo sa Office of the Senior Citizens Affairs (OSCA), Rolando Llaguno, nga padayon ang ilang signature campaign hangtud sa paghuman niining tuiga.

Kagahapon naabtan sa Banat News si Virgilio Tabasa, usa ka senior citizen sa barangay Toong, sa opisina sa OSCA aron sa pagpahibawo ni Llaguno nga mosuporta siya sa maong lakang.

Gani dili lang P2,000 ang iyang buot nga ihatag kundi ang kinatibuk-ang P5,000 nga kuwang sa siyudad nga cash assistance.

Sa P12,000 nga madawat sa mga senior citizens karong tuiga, P7,000 pa lang ang ilang nadawat.

Daku ang pasalamat ni Llaguno kang Tabasa ug nanghinaut nga mosuporta ang ubang senior citizens sa iyang tanyag.

Sa dihang gipangutana si Tabasa kun iya ba nga gi-agni ang ubang mga senior citizens nga mosunod sa iyang gibuhat, siya miingon nga iya ra kining kaugalingon nga desisyon ug wala siya’y tumong nga impluwensiyahan ang uban kay aduna man pud sila’y ilang kaugalingon nga baruganan.

Gusto lang niya nga makatabang sa katukuran sa CCMC kay matud pa niya ang mosunod man nga henerasyon ang makabenepisyo niini.

Base sa naunang taho, wala mosugot ang mga senior citizens sa barangay Parian nga i-donate ang maong kantidad tungod kay wala na sila’y mapalit og tambal. Si Ines Sumampong nga taga barangay San Roque niingon nga andam siya mohatag apan P1,500 lang. Giklaro ni Llaguno nga dili pinugsanay ang pag-donate sa mga seniors citizens og P2,000 alang sa CCMC.

Matud niya dawaton sa OSCA kun bisan pila ang ilang gusto nga ihatag apan iyang gidasig ang mga senior citizens nga kun mahimo P2,000 lang unta. Base sa “Manifesto of Support for the Construction of the New Cebu City Medical Center” nga gipapirmahan, sa kinatibuk-ang P720 milyones nga cash assistance sa 60,000 ka senior citizens sa siyudad, P100 milyones ang gustong ihatag sa OSCA alang sa CCMC. (BANAT NEWS)