Stress debriefing sa mga tinun-an sa Bo. Luz ipahigayun
CEBU, Philippines - Nagtinguha ang mga magtutudlo sa Bario Luz National High School nga mopahigayun og stress debriefing sa mga tinun-an nga biktima sa sunog niadtong adlaw’ng Martes.
Matud sa administrative assistant sa tunghaan, Maria Evelyn Cuajao, nga dili lalim ang nasinati sa mga tinun-an ug posibleng maghatag kini og trauma sa mga bata tungod sa panghitabo.
Nasayran nga 45 ka tinun-an sa high school ug kapin sa 100 ka tinun-an sa elementarya ang tinguha nga matabangan sa tunghaan.
Una niini, ang mga biktima temporaryo nga gipahiluna sa nahisgutang tunghaan ug wala ra kini makahatag og problema sa ilang pagpahigayun sa klase sanglit magamit ra gihapon ang ilang mga lawak-saringan nga gipang-okupar sa biktima sa sunog. Nasayran nga wala usab magproblema sa seguridad sa tunghaan tungod kay dunay mga barangay tanod ug kapolisan nga nagpuli-puli pagbantay sa dapit. (Decemay P. Padilla/GMR)(BANAT NEWS)
- Latest
