Nakigpinusilay sa SWAT nadakpan
CEBU, Philippines - Usa ang nasikop ug usa ang nakaikyas sa duha ka mga armadong tawo nga giingong nakigpinusilay pa sa kapulisan niadtong Miyerkules sa gabii diha sa P.G Almendras Street, Poblacion, Danao City.
Ang nasikop sa kapulisan naila nga si Rey Manipis, 19, taga Ilaya, Poblacion, sa maong siyudad kinsa nakuhaan og usa ka .357 revolver nga duna’y unom ka mga bala, usa ka rifle grenade sulod sa iyang sling bag ug usa ka itom nga bonnet.
Samtang ang nakaikyas naila nga si Ian Laurel. Matud pa ni PO2 Nelson Pantoja sa Danao Police nga nahinabi sa Banat News nakadawat sila og tawag ma’y labot sa duha ka mga armadong tawo nga nasigpatan sa maong lugar.
Dihang giadto sa mga sakop sa Special Weapons and Tactics (SWAT) Team giingong nanagan ang mga suspek ug mipaarak sa dala nga armas, apan walay naigo sa mga pulis.
Nahitabo pa ang ginukoray tali sa mga suspek ug hangtod nga ilang nasikop si Manipis. Gisubay na sa kapolisan ang record sa duha ka suspek. (BANAT NEWS)
- Latest
