Hepe, treasurer ipatawag sa konseho
CEBU, Philippines – Gikatakdang muatubang sa sesyon sa konseho sa dakbayan sa Toledo ang hepe sa kapolisan ug city treasurer. Sila si Police Chief Insp. Ricky Delilis ug City Treasurer Ofelia Oliva ang ipatawag sa konseho sa siyudad.
Kini aron mapasabot ang konseho sa nahitabo nga pagpanglungkab sa Treasurer’s Office usa ka semana na ang nakalabay.
Gusto masayud ang konseho kon pila ang kinatibuk-ang kantidad nga nahanaw ug nadala sa wala pa mailhing kawatan.
Unang gikataho nga kapin sa P6 milyones apan giingong kapin lang sa usa ka milyon.
Gusto usab masayran sa konseho kon unsa’y plano ug lakang sa hepe sa kapolisan sa siyudad human sa sunod-sunod nga krimen nga nahitabo.
Nasayran nga pipila ka adlaw pa lang sa paglingkod sa pwesto ni Delilis sunod-sunod ang nahitabong krimen sa siyudad sama sa pagpamusil sa usa ka kawani sa Toledo City Hall ug sa paglungkab sa Treasurer’s Office.
Nabalaka ang mga sakop sa konseho sa kahadlok nga sila na usab unya ang mabiktima sa krimen.
Gitan-aw usab sa mga opisyal sa siyudad ang kabalaka sa seguridad sa katawhan. -/GMR) (BANAT NEWS)
- Latest
