Duha ka sakop sa labor union gidakop
CEBU, Philippines - Gidakop sa Special Weapon and Tactics (SWAT) ang duha ka armadong lalaki human gialarma kagahapon sa buntag sa North Reclamation Area, dakbayan sa Sugbo.
Ang mga dinakpan naila nga sila si Porferio Largo Jr., 37, ug Teofilo Baritogo, 65, pulos taga dakbayan sa Toledo.
Matud sa hepe sa Investigation and Detection Management Branch, Chief Insp. Aileen Recla, nga nakadawat og tawag ang mga sakop sa SWAT nga dunay lima ka tawo sa NRA nga armado hinungdan nga daling girespondehan.
Sa wala pa masikop ang mga suspetsado, sumala pa ni Recla nga cooperative ang maong mga lalaki ug matud pa mipakita dayon sa ilang mission order nga gikan sa Rehiyon-9.
Wala usab makapakita og lisensya ang maong mga lalaki hinungdan sa ilang pagkasikop.
Giimbitar sa kapolisan ang tulo nila ka kauban apan gibuhian human nga wala’y nakita ang kapolisan nga rason aron sila prisohon.
Nasuta nga ang lima sakop sa usa ka union sa dakbayan sa Toledo ug padulong sila motambong sa usa ka meeting sa Department of Labor and Employment.
Sumala pa nga gikan pa sa dakbayan sa Toledo ang mga suspetsado apan miadto sila sa North Reclamation Area aron mokaon. (BANAT NEWS)
- Latest
