Namatay sa meningo

CEBU, Philippines- Gitug-an sa Regional Epidemiology and Surveillance Unit (RESU-7) nga  usa ka lalaki nga minyo didto sa dakbayan sa Danao ang namatay tungod sa sakit nga meningococcemia.

Matud ni Dr. Renan Cimafranca, pangu sa RESU-7 nga gidala ang maong lalaki nga pasyente sa Danao Provincial Hospital apan tungod sa pagduda nga meningococcemia ang sakit niini gibalhin kini dayon sa Vicente Sotto Memorial Medical Center.

Agosto 15 nalandig  sa VSMMC ang maong pasyente apan namatay kini sa  pagkasunod nga adlaw ug gimando nga ilubong dayon  niadtong Agosto 17 human makuhaan og specimen alang sa confirmation.

Giingong   dunay nakitang mga sintomas sa meningococcemia ang mga doctor sama sa taas kaayo nga hilanat, dili normal nga pag-estorya tungod apektado na ang utok niini ug may nanggawas nga rashes sa kalawasan.

Ang namatay maoy ikaduha nga nataptan sa maong sakit dinhi sa Sugbo ug maoy labing unang nakompirmar sa laboratoryo.

Gipasabot ni Cimafranca nga kinahanglan nga ilubong dayon ang mga tawo nga mamatay sa maong sakit tungod kay highly contagious kini o daling makatakod.

Ang mga kabanay sa namatay ug ang mga tawo mipaduol niini gipainom na og tambal ug gi-monitor na usab ang uban nilang mga silingan ug mga tawong nakahimamat niini.

Giawhag usab sa RESU ang publiko kon may mga sintomas nga sama sa meningococcemia nga magpakonsulta g’yud dayon sa tambalanan aron dili mograbe ang maong sakit. - /EIM) (BANAT NEWS)