Tulisan nalipat sa wala’y sulod nga pitaka

CEBU, Philippines- Nalipat ang armadong tulisan nga nagsakay og biseklita human ang iyang biktima  nipakita sa wala’y sulod nga pitaka hinungdan nga ang cellphone ra ang nakuha.

Ang biktima mao si Eralyn Pios, 33-anyos, dalaga nga taga Iba, Basak, dakbayan sa Lapu-Lapu ug nagtrabaho isip treasurer supervisor sa SM Hyper Mart sa Subangdaku, Mandaue.

Nahitabo ang pagpanulis sa pagkanaug sa biktima gikan sa giluwanang jeepney alas 12 sa udto kagahapon sa may North Reclamation Area sa Subangdaku.

Si SPO1 Michael Limalima sa Presinto 2 sa Mandaue City Police Office (MCPO) miingon nga naglakaw ang biktima dihang kalit gibabagan sa biseklita nga giluwanan sa wala mailhing lalaki.

Gitionan og armas ang biktima ug gihulga pa sa tulisan nga buslotan ang lapa-lapa sa iyang tiil pinaagi sa gidala niining pusil kon magdumili paghatag sa iyang salapi, cellphone ug mga alahas.

Gumikan sa kahadlok daling gikuha ang iyang cellphone ug gitunol ngadto sa tulisan.

Dihang nangita ang tulisan og kuwarta maoy gipakita sa biktima ang wala’y sulod nga pitaka.

Matud ni Limalima nga may laing pitaka ang biktima nga maoy gisudlan sa iyang suweldo.

Sa kabalaka nga madala kini sa tulisan, nagpakiluoy ang biktima nga wala siya’y kuwarta.

Dugang gitug-an sa biktima nga naglingo-lingo na lang sa iyang ulo ang tulisan nga nagtan-aw sa wala’y sulod niining pitaka ug nanamilit pa dayong pagbiya ug miingon nga, “ba-bye guwapa, I love you!” - /GMR) (BANAT NEWS)