Lima gipamusil, usa ang patay

CEBU, Philippines- Usa ang patay samtang upat ang nangaangol sa pagpamusil miaging Domingo sa lain-laing dapit sa probinsya sa Sugbo. Ang namatay mao si Ernesto Alcontin, 33, lumolupyo sa Barangay Zaragosa, Aloguinsan  human gipusil sa igsuon sa iyang uyab nga si Josiemel Madaya, 32, nagpuyo sa gihisgutang lugar.

Matud ni PO3 Nap Kelly Segarra, sa Aloguinsan Police Station nga nag-away si Alcontin ug ang iyang uyab niadtong tungora ug giingong gipusil niini ang cellphone sa dalaga ug pagkahuman gitionan pa gyud kini sa armas. Ang suspek kinsa nagtuong gitionan iyang asawa diha sa ilang tindahan daling mikuha og armas dayong pusil kang Alcontin nga naigo sa walang abaga. Patay na kini pag-abot sa tambalanan.

Samtang naangol usab sa laing pagpamusil ang usa ka Bhomar Campanilla, 23, taga Barangay Rosario, Aloguinsan human gipusil samtang nanghipos og baso sa ilang giimnan sa Barangay Rosario sa mao gihapong lungsod.

Ang namusil giingong mipahipi sa ngitngit nga bahin sa lugar ug maayong pagkaigo sa hawak ug sa wala nga paa sa biktima.

Sa Jubay, Liloan, usa ka Archie Vega, 26, ang naangol human gipusil sa tiyan sa naila lang sa pangalan nga Baclay samtang iyang gikomprontase dihang gipasalbahan siya niini atol sa paglabay sa tungod sa suspek. Laing napusilan sa mao gihapong lungsod ang usa ka Alcio Cacanog, 27, diha sa Barangay Tayud. Duha ka wa mailhing lalaki nga nagmotor ang migukod kaniya ug diretsong mipusil sa iyang likod duha ka higayon.

Usa ka Roland Manggiran, 32, usab sa dakbayan sa Danao ang naangol human kini gipusil sa silingan nga si Leonides Cal Jr. samtang kini nalibang sa hilit nga dapit sa Calumboyan, Cambanay, Danao. Si Manggiran nakaangkon og samad pinusilan sa wala nga paa ug nalandig sa tambalanan. -  /EIM) (BANAT NEWS)