Akrho nga gipatay nailhan na

CEBU, Philippines - Nailhan na sa kapolisan ang   usa ka sakop sa grupong Alpha Kappa Rho (AKRHO) nga gipusil patay niadtong Biyernes sa eskina V. Rama ug B. Rodriquez, Calamba, dakbayan sa Sugbo.

Kini ang gibutyag ni PO1 Michael Angelo Singson sa homicide section sa Cebu City Police Office (CCPO) nga nahinabi sa Banat News.

Ang biktima naila nga si Jason Cañete Corro, 31, ulitawo ug nagpuyo sa Guadalupe, dakbayan sa Sugbo.

Ang igsoon sa biktima nga si Jodel nga taga dakbayan sa Lapu-Lapu ang mihatag sa kasayuran ngadto sa kapolisan.

Sumala pa ni Singson nga dugay nilang nailhan ang tinuora’y nga pangan sa biktima human wala’y usa sa crime scene ang nakaila sa namatay.

Dihang gisuwayan og tan-aw ang mga phonebook sa cellphone sa biktima, ilang nakit-an ang pangan nga “brad Jodel” hinungdan nga ila kining gitawagan og nakompirmar nga iyang manghud ang gipusil patay.

Ang maguwang sa biktima wala usab makahatag og impormasyon sa kapolisan sa posibleng motibo sa pagpamusil sanglit wala siya’y kasayuran sa kalihukan sa iyang igsoon.

Si Singson mipasabot nga posibleng gi-set up lang ang biktima sa mga kontra niini ug gipa-adto sa maong lugar aron patyon base sa mga text messages nga nakuha sa kapolisan.  (BANAT NEWS)