May kaso kaniadto giatangan gipatay

CEBU, Philippines - Usa ka lalaki nga gituohan nga adunay criminal record sa pagpangawat ang gipusil patay sa usa ka wala mailhing  tawo diha sa Bato, Barangay Maribago dakbayan sa Lapu-Lapu sa miaging Miyerkules sa gabii.

Ang biktima nailhan sa pangan nga Ian Anudling, 32, residente sa mao nga barangay.

Basi sa inisyal nga imbestigasyon ni Luisito Ernie sa Lapu-Lapu City Police Office- Homicide Section, ang pagpamusil nahitabo alas- 11 sa gabii.

Si Anudling gikan nakig-inom kuyog sa iyang duha ka mga higala sulod sa ilahang balay ug gihatud ni Anudling ang iyang mga amigo padulong gawas atol sa ilang pagpamauli.

Apan matud pa sa pagbalik ni Anudling sa ilaha dunay wala mailhing tawo nga misunod kaniya ug mipusil sa iyang abaga tulo ka higayon nga miresulta sa iyang kamatayon. Matud sa inahan sa biktima nga si Francisca Anudling,  miangkon nga napriso na kaniadto ang anak tungod sa kasong pagpangawat. (BANAT NEWS)