Mga drayber gidid-an pagpanabako kun mag-drive

CEBU, Philippines - Drayber og passenger jeepney nga nasakpang nanabako samtang nagmaneho sa iyang sakyanan giingon nga mipadam-ag unta sa duha ka City Hall employees nga moisyu kaniya og ticket aron pamultahon.

Si Elmer Atuel giingong mipadagan sa iyang sakyanan tungod kay naglagot nga isyuhan g’yud siya’g citation ticket nila ni Marvin Baguio ug Leo Hortelano, mga sakop sa City Environmental Sanitation Enforcement Team (Ceset). Ang hepe sa Ceset nga si Grace Luardo miingon nga swerte ang duha niya ka sakop kay abtik nga nakaikid dihang si Atuel mikalit pagpadagan sa gimaneho niini nga PUJ.

Naghunong ang PUJ nga gimaneho ni Atuel diha sa D. Jakosalem kilid sa University of the Visayas (UV) samtang nagpaabot og pasahero apan nanigarilyo.

Matud ni Luardo nga P2 mil ang multa sa mga masakpan nga manigarilyo sulod sa mga public utility vehicles. Gawas sa mao nga multa, si Atuel makabayad pa og dugang multa kay gitinguha niya nga padam-agan ang duha ka Ceset enforcers.

Nadakpan siya dihang gigukod sa mga sakop sa Ceset ug mga sakop sa Citom. Si Luardo miingon nga wala sila’y pili sa pagpanakop kay bisan gani si Konsehal Dave Tumulak ilang giisyohan og citation ticket diha’ng nasakpan nga nanigarilyo usab luwan sa iyang government service vehicle.