Bata nahagbong sa dagat patay
CEBU, Philippines - Patay nang naglutaw sa dagat ang usa ka bata human kini matagak sa ilang balay ug nalumos sa sitio Seaside, barangay Pajo, dakbayan sa Lapu-Lapu kagahapon sa buntag.
Ang nalumos nailhan nga si Mary Jane Villagonzalo, usa ka tuig ug walo ka buwan ang pangedaron ug nagpuyo sa maong lugar.
Ang inahan sa bata nga si Suzette Villagonzalo mitug-an ngadto nilang PO3 Allan Pantaleon ug PO3 Joseph Cotamda nga gumikan sa napulo ka anak nga iyang giatiman niadtong higayona, wala niya nabantayi nga nahulog na ang iyang kamanghurang anak sa dagat.
Ang panimalay nahimutang ilawom sa unang taytayan sa Mactan ug Mandaue.
Si Eva Mae Avon nga silingan sa biktima maoy nakakita nga naglutaw na sa dagat ang bata alas 6:30 kagahapon sa buntag hinungdan nga mitawag kini sa kapulisan.
Gisuwayan pa og dala sa Our Lady of the Rule Hospital apan gideklarar ang bata nga patay. (BANAT NEWS)
- Latest
