HPG dili kahatag lista sa mga sakyanan

CEBU, Philippines - Gisalikway sa kadagkoan sa PNP Highway Patrol Group sa Camp Crame ang awhag sa Cebu City Council nga imbentaryohon ang mga sakyanan nga gi-impound sa Sitio Sudlon, Barangay Lahug.

Si HPG Director Arrazad P. Subong mipadala og suwat sa mga opisyal sa dakbayan sa Sugbo ug mipasabot nga dili sila makahatag og lista sa mga sakyanan nga ilang gi-impound. Gihulagway ni Subong nga “ultra vires” kon inbalido ang resolusyon sa konseho nga nag-awhag sa HPG-Manila nga mandoan ang ilang mga sakop sa Sugbo nga mohatag og inventory report sa ilang mga sakyanan nga nasakmit.

Matud ni Subong nga ang mao nga mga sakyanan ebidensya kini sa mga kaso nga gipasaka nila batok sa lainlaing akusado diha sa mga hukmanan ug dili tukma nga ibulgar kini sa publiko.

Ang opisyal sa Camp Crame nagkanayon nga ang Korte Suprema daan na nga mihukom nga ang mga impormasyon nga naglambigit sa kapolisan ug militar mahitungod sa seguridad dili basta-basta nga ibutyag.

Ang mga konsehal sa dakbayan nagtinguha nga ang HPG-7 mohatag og lista sa mga sakyanan nga ilang gi-impound aron magamit sa NBI sa nagpadayong imbestigasyon sa pagpatay ni Atty. Noel Archival ug duha ka kauban.

Matud ni Subong nga kabahin sa ilang mga opisyal sa HPG-7 nga dinhi madestino sa Sugbo kaniadto, ang ilang buhatan mipasaka na og kaso nga administratiba batok nila ni Senior Supt. Romualdo Eglesia ug kaubanan.

Kini tungod sa report nga ang mga sakyanan nga gitanggong unta sa ilang impounding area gigamit-gamit ra ug maoy giingong gisakyan sa mga tawo nga mibanhig ni Archival. (BANAT NEWS)