Wa’y lisensiya nakadasmag patay sa 75 anyos nga ulay

CEBU, Philippines - Patay ang 75 anyos nga ulay human dasmagi sa motorsiklo nga gimaneho sa usa ka 19 anyos nga babaye nga walay lisensiya niadtong Miyerkules sa hapon sa Barangay Pulo, Alcantara.

Gumikan sa grabeng bun-og ug samad sa lawas, wala na matabang pa sa Badian District Hospital ang usa ka Francisca Dangiles, 75, dalaga, nagpuyo sa Barangay Lawaan, Alcantara.

Ang nagmaneho sa motorsiklo nailhan nga si Janeth Vince Cantilla, 19, nga taga lungsod sa Moalboal.

Si PO3 Nestor Tonilon, imbestigador sa Alcantara Police Station nga nahinabi sa Banat News, mibutyag nga  paingon unta ang drayber sa motorsiklo sa Moalboal gikan sa Alcantara.

Pag-abot sa Barangay Pulo, giingong kalit lang milabang si Dangiles hinungdan nga maayong pagkasabak sa motorsiklo.

Matud ni Tonilon nga base sa asoy sa nakakita sa panghitabo nga kusog ang dagan sa motorsiklo gumikan kay tul-id kaayo ang dalan ug wala’y laing sakyanan nga nagdagan niadtong higayona.

Sa pagsubay sa kapulisan, bisan student permit wala’y napakita ang drayber sa motorsiklo ug wala usab kini nag-helmet.

Lakip sa gidala sa Badian District Hospital ang drayber sa motorsiklo gumikan sa mga pangos ug bun-og nga naangkon.

Hinuon sumala pa ni Tonilon nga nagkasinabot ra ang pamilya sa namatay ug sa nakabangga hinungdan nga ila ra usab dayun gibuhian ang drayber apan gipabayad gihapon og multa kapin usa ka libo ka pesos gumikan sa kalapasan sa Municipal Ordinance batok pagmaneho nga wala’y lisensya. (BANAT NEWS)