Prayer rally vs pork barrel himuon sa Hunyo 12

CEBU, Philippines - Mopahigayon og usa ka prayer rally ang Cebu Coalition Against Pork Barrel System diha sa Fuente Osmeña  atol sa Independence Day karong Hunyo 12. Tumong sa kalihukan aron pag-awhag sa gobiyerno nga ikiha, taralon ug mokanaog sa ilang pwesto ang mga nalambigit sa pork barrel scam.

Matud ni Marco Canton nga ang mopasiugda niini mao ang Cebu Coalition ug Movement For Livable Cebu nga tumong sa maong prayer rally.

Si Rev. Jesse Primacio sa United Church of Christ of the Philippines (UCCP) nagkanayon nga dili lang kadtong mga anaa sa oposisyon ang angay nga iduot sa kaso tungod kay adunay mga public officials nga kaalyado sa presidente ang nalambigit usab sa kontrobersiya.

Samtang giawhag ni Msgr. Rommel Kintanar si Presidente Benigno Aquino III nga walay pilion kini bisan og kaalyado man sa politika, pahamtangan  ni sa tukmang silot.

Matud sa grupo nga nagpadayon gihapon ang pork barrel,  apan kun mahitabo nga i-abolish na kini, mabulahan ang katawhan kay  direkta na nga mapunta sa mga basic services ang pundo.

Gilauman nga di mominos sa dos mil ka tawo ang mosalmot sa  kalihukan ug may gihan-ay na nga mga kalihukan aron pagtuki batok sa pork barrel. (/EIM)(BANAT NEWS)