Presyo sa school supplies gimonitor
CEBU, Philippines - Gihugtan sa Department of Trade and Industry ang pagmonitor sa presyo sa mga school supplies sa amihanang bahin sa lalawigan sa Sugbo human gilibkas na sa ilang buhatan ang price freeze sa mga nag-unang palaliton sa lugar nga grabeng naapektohan sa bagyong Yolanda.
Kini aron pagseguro nga makapalit gyud ang mga ginikanan sa mga bata sa mga gikinahanglang gamit sa eskwelahan sa makatarunganon nga presyo.
Matud ni DTI-Cebu provincial officer ug hepe sa Consumer Welfare and Business Regulation, Zaide Bation, nga giuna nila sa pagsusi ang mga school supplies sama sa notebooks, papel, lapis ug uban pa sa mga dapit sa Central Visayas nga apektado sa bagyo.
Gipahimangnoan ni Bation ang mga negosyante nga tumanon gyud ang suggested retail price aron dili kini mapasakaan og kaso sa ilang buhatan.
Hinoon gipahibawo ni Bation nga gikan sa bulan sa Abril hangtud sa unang adlaw sa bulan sa Hunyo, ang ilang buhatan wala makamatikod nga dunay nag-over price sa presyo sa mga school supplies.
Giawhag ni Bation ang publiko nga mosumbong sa ilang buhatan kung may mamatikdan nga pagtaas sa presyo sa mga school supplies. (BANAT NEWS)
- Latest