Isda gikan Zamboanga gisakmit

CEBU, Philippines - Gisakmit sa mga awtoridad ang 30 ka banyera nga gituohang pinabuthang isda nga luwan sa usa ka bangka nga gikan sa Zamboanga nga midunggo sa dakbayan sa Mandaue kagahapon sa kaadlawon. Ang Cebu Provincial Anti-Illegal Fishing Task Force kauban sa Provincial Agriculture, Bureau of Fisheries and Aquatic Resources ug Maritime Police nagtambayayong sa operasyon aron sa pagsikop sa maong bangka. 

Ang nagkalainlaing matang sa isda nga gituohang first class ang gipangapod-apod sa pipila ka mga charitable institutions sama sa Missionaries of Charity, Asilo de la Milagrosa, The Children of Cebu Foundation, Incorporated, ug Cebu Provincial Detention and Rehabilitation Center (CPDRC).

Si Jobert Soriano, sakop sa task force nagkanayon nga dili nila pwedeng itanggong ang kapitan sa bangka ug mga tripulante tungod kay igo ra kining naghatud sa kargamento ug wala usab sila kaila sa tag-iya sa kargamento.  (BANAT NEWS)