Drug user migradwar nga labing hawod

CEBU, Philippines - Ang 26 ka binilanggo sa Mandaue City Jail nga mipadayon pagtungha bisan anaa sila sulod sa prisohan ubos sa Alternative Learning System (ALS) sa Department of Education nakagradwar na gayud. Ang labing una nga ALS graduation sa mga piniriso sa Mandaue City Jail gipahigayon kagahapon sa udto sulod sa bilanggoan.

Ang nakalampos sa ilang pagtoon mao ang 16 ka tinun-an sa high school ug walo ka tinun-an sa elementarya nga gilangkoban sa mga babaye ug lalaki gikan sa 46 ka binilanggo nga mipasar sa pasulit niadtong Oktubre.

Si Jail Warden Gil Inopia mitambong sa graduation nga gipasiugdahan nila ni Dr. Virginia Zapanta nga maoy DepEd school’s superintendent sa Mandaue, Konsehal Demetrio Cortes Jr. nga maoy chairman sa committee on education sa konseho sa dakbayan ug Looc Barangay Kapitan Cesar Sol Cabahug ug uban pa. Si Marino Rosaceña, 33, taga Barangay Paknaan, dakbayan sa Mandaue nga lima na ka tuig nga nabilanggo tungod sa kaso nga paghupot og ilegal nga drugas maoy nakakuha og labing taas nga grado sa mga migradwar ug nakadawat kini og silver medal.

Giangkon ni Rosaceña nga igo lang siya nga nakahuman sa second year high school dihang siya nadakpan sa paghupot og illegal nga drugas mga lima na ka tuig ang nakalabay.

Ang taas niya’ng grado nga nakuha sa pagradwar sa ALS maoy nakadasig kaniya sa pagpadayon sa pagtungha sa kolehiyo ug ipadayon ang naputol niyang pangandoy nga mahimong engineer  sa higayon nga makagawas na kini sa bilanggoan.

Si  Louie Patricio Batal nga usa sa mga ALS teacher sa DepEd- Mandaue City Division miingon nga ang mga binilanggo nga migradwar kagahapon maoy kabahin sa 46 ka binilanggo sa Mandaue City Jail nga mipasar sa pasulit nga ilang gipahigayon niadtong Oktubre 2013.

Giangkon ni Batal nga nagkagamay ang gidaghanon  sa migradwar tungod sa ALS kay ang ubang binilanggo nakagawas na samtang ang uban gipadala na sa National Bilibid Prisons (NBP) sa Muntinlupa. (/RUB)(BANAT NEWS)