Kaso batok sa cult leader mohuyang?

CEBU, Philippines - Nabalaka karon ang  Provincial Women’s Commission nga mohuyang ang kasong serious illegal detention nga gisang-at batok sa giingong lider sa ‘kulto’ didto sa lungsod sa Balamban.

Si Bise Gobernador Agnes Magpale nga maoy co-chairman sa PWC miingon nga human gi-release sa kostodiya sa PWC si Emma, ang giingong biktima nga gi-detain sa cult leader, miingon kini nga gusto siya’ng mobalik sa gipuy-an ni Casiano “Tatay Boy” Apduhan didto sa Balamban.

Matud ni Magpale nga kun kini mahitabo molutaw nga wala gayud diay pugsa si Emma sa pagpapuyo didto sa balay sa giingong cult leader.

Gani si Emma mibisita usab kang Apduhan nga gitanggong na karon sa Toledo City Jail.

Gisaysay ni Magpale nga sigon sa mga igsuon ni Emma, gisaaran kini nga mahimo nga ‘balaan’ nga babaye’ng gikatakda alang sa Diyos Amahan.

Nagtigom kagahapon ang mga sakop sa Technical Working Group sa PWC, apil na ang National Bureau of Investigation (NBI), aron sa pagplano sa ilang mga lakang aron mapahugtan pa ang kaso batok ni Apduhan.

Si Magpale usab mibutyag nga aduna nay resulta sa gihimong psychological and physical examination kang Emma apan midumili pagbutyag niini sa pagkakaron.

Gipasakaan og kasong serious illegal detention si Apduhan kay matud pa gi-detain si Emma sa iyang panimalay sulod sa lima na ka tuig bisan supak sa kagustohan sa babaye apan gihimakak kini sa cult leader.

Gipasakaan usab og kasong illegal possession of firearms si Apduhan. – (BANAT NEWS)