Upat ka sunog miulbo sa Cebu City,Talisay ug Naga

CEBU, Philippines - Usa ang angol ug lima ka balay ang naugdaw sa sunog nga miigo sa managlahing dapit sa Sugbo.

Ang lima ka balay nga nasunog nahimutang sa sitio Upper San Roque sa Bulacao pasado alas 11:00 sa miaging gabii. Nadawat sa kabomberohan sa dakbayan sa Sugbo ang alarma sa alas 11:50 ug nakontrolar kini sa alas 12:15 human giisa sa second alarm nga nagbilin og P70 mil nga danyos.

Naangol sa maong sunog si Francisco Lacno nga gikatahong usa ka paralitiko nga nakaangkon og paso sa iyang buko-buko. Base sa imbestigasyon ni SFO1 Lowell Opolentisima nga didto nagsugod sa balay ni Ernesto dela Torre ang sunog ug dali kining mikatap sa kasilinganan ug gidudahang electrical misuse ang hinungdan niini.

Samtang pasado alas 8:00 sa miaging gabii nasunog ang balay sa usa ka Churchil Estella sa barangay Pangdan sa dakbayan sa Naga.

Wala hinuon makatabok sa laing balay ang maong sunog ug nakontrolar kini sulod sa 5-10 minutos. Gibanabana nga mokabat og P300 mil ang danyos sa maong sunog sumala pa sa imbestigasyon ni Sr. Insp. Donald Geniston.

Samtang nasunog sab ang bunkhouse sa  usa ka mall sa Tabunok, Talisay nga gidudahang nabiyaang lampara ang hinungdan, hinuon P3 mil lang ang danyos niini.

Nasunog sab ang Kidney patient room sa North General Hospital sa Kauswagan Road, barangay San Jose sa dakbayan sa Sugbo pasado alas 5:00 sa miaging buntag.

Sa laing bahin, kabomberohan mi-discourage sa “octopus connection” tungod kay mao kini usa sa hinungdan sa sunog matud ni Talisay City Fire Marshal Randy Mendaros.

Si Mendaros nagkanayon nga bisan og dili pa fire prevention month nagpahigayon sila og bisita diha sa kabarangayan aron edukahon ang mga residente sa matag barangay sa paglikay sa sunog.

Matud ni Mendaros nga ilang nabantayan ang mga octopus connections o ang usa ka balay nga mao lang ang dunay direktang koneksiyon ug kwentador  apan mikonektar ang mga silingan. Ang maong koneksyon maoy usa sa mga hinungdan sa sunog tungod kay mag-overload ang kuryente kay daghan ang nigamit.

Gipahimug-atan usab ni Mendaros ang kooperasyon sa mga residente sa fire drills ug magsabot asa ilang evacuation site. - /EIM (BANAT NEWS)