Nadakpan sa hantak

CEBU, Philippines - Nasakmitan usab sa kapolisan og shabu ang usa ka tawo nga ilang nadakpang nagsugal og hantak didto sa Barangay Tipolo, dakbayan sa Mandaue lapas ang tungang gabii kaniadtong Miyerkules. Ang nadakpan mao si Lord Vincent Rosas, 31, taga Basubas Compound sa Barangay Tipolo.

Si PO2 Fredelou Quezon, sakop sa Presinto 2 sa Mandaue City Police Office (MCPO), miingon nga ang iyang mga kauban nagpatrolya sa mga barangay nga ubos sa ilang teritoryo.

Ilang nasigpatan ang nagtapok nga mga lalaki nga naglingkod ug pipila kanila nagbarog nga nagtan-aw sa tawo didto sa tunga nag-antog.

Samtang nagkaduol ang kapolisan sa nagtapok nga mga lalaki, usa kanila nakakita misinggit. Ang mga lalaki nga nagtapok dali nga nakahakop sa kwarta nga ilang gipusta ug nagkatibulaag sa pagpanagan apan si Rosas nga nagdali unta pagsibat maoy ilang nasugatan ug nagunitan.

Nakaplagan sa kapolisan ang lapad nga bato nga gihimong antugan ug ang tulo ka sinsiyo nga 25 sentabos nga gihimo nilang panalang.   Pagrekisa sa kapolisan ni Rosas ila kining nakuhaan og usa ka pakete nga gitoohang shabu nga gisulod sa iyang bulsa. Ang pakete gisumiter sa PNP Crime Laboratory Service aron sutaon kun tinuod ba nga shabu.  (BANAT NEWS)