Babaye nga pusher nadakpan

CEBU, Philippines - Nadakpan sa kapolisan sa Lapu-Lapu ang usa ka babaye nga maoy gikatahapan nga "source" sa illegal nga drugas sa Sitio Soong, Brgy. Mactan. Ang nasikop mao si Divina Amodia alyas "Vina", 44, minyo ug gitumbok nga maoy kuhaanan sa mga binultong shabu ug gipamaligya sa mga drug pushers.

Samtang ang kapolisan sa Lapu-Lapu midakop usab ni Saturnino Amodia, 57, minyo ug bayaw ni Divina Amodia kay adunay pending warrant of arrest sa kaso kabahin gihapon sa illegal nga drugas.

Matud ni Senior Inspector Rogelio Peneda Jr., gironda nila ang balay ni Divina Amodia base sa search warrant nga giluwatan ni RTC Judge Toribio Quiuag.

Nakuha gikan ni Amodia ang tulo ka bulto nga gituohan nga ang sulod shabu nga mokantidad og P75 mil. Ang matag usa ka bulto mitimbang og lima ka gramos.

Ang bana ni Amodia nadakpan usab sa kapolisan duha na ka tuig ang milabay ug nagtingkagol pa kini sa Lapu-Lapu City Jail.

Sama sa ubang dinakpan si Amodia mirason sa kawad-on nga maoy hinungdan nga miapil siya pagpamaligya og ginadling drugas. (/RUB)(BANAT NEWS)