Rama may mando sa bag-ong city engineer

CEBU, Philippines - Gimandoan ni Mayor Michael Rama ang Acting City Engineer nga si Jose Marie Poblete nga atimanon dayon ang mga kanal nga wala nay mga tabon nga makahatag og peligro sa katawhan kun dunay kusog nga uwan.

Apil sa mga lungag sa drainage systems nga ipatagad ni Mayor Rama mao ang nahimutang sa kilid sa building sa The Freeman sa D. Jakosalem eskena V. Gullas.

Ang mao nga mga drainage system nga wala’y tabon nakahatag og peligro kun adunay paglunop sa mao nga dapit kay hayan mabuwasot sa lungag ang mga tawo nga maglakaw.

Ang dapit sa D. Jakosalem ug V. Gullas kanunay nga maglunop kun adunay kusog nga uwan tungod sa pagsuyla sa tubig nga gikan sa sapa nga anaa mag-agi ilawom sa mga tindahan sa dalan Colon.   (Rene U. Borromeo)

Camp Maxilom banhawon

Gisugyot sa provincial director sa kapolisan sa Sugbo nga ang bag-o nila nga headquarters nga nahimutang sa Sitio Sudlon, Lahug hinganlan og Camp General Arcadio Maxilom.

Ang lakang ni Senior Superintendent Noel Gillamac gitumong aron mahatagan og dungog si Maxilom, kanhi lumad nga taga Tuburan. Si Maxilom usa ka magtutudlo dihang misulod sa Katipunan nga gipangulohan ni Pantaleon Villegas nga nabantog sa angga nga Leon Kilat.

Human gibudhian ug gipatay si Leon Kilat sa iyang kauban, si Maxilom na ang nibarog nga lider sa rebolusyon sa Sugbo.

Mipadala siya og sulat ngadto sa mga Katsila nga mo-surrender ang iyang pundok apan naabtan kini sa pagbaligya sa Espanya sa Pilipinas ngadto sa Amerika 

Si Maxilom namatay didto sa lungsod sa Tuburan human siya maparalisar sa taas nga panahon.

Matud ni Gillamac nga tinguha niya nga nganlan aron mailhan pa ang maong buhatan sama sa Camp Sotero Cabahug, ang headquarters sa Cebu City Police Office.

 Gipadad-an na og sulat ni Gillamac ang kapitolyo apan wala pa gihapon niya madawat ang ilang tubag.

Miingon si Gillamac nga lakip si Gobernador Hilario Davide ug Bise Gobernador Agnes Magpale iyang gihatagan sa iyang sulat. (BANAT NEWS)