Otoridad, Katoliko di pa motuo sa maong milagro

CEBU, Philippines - Samtang  si Rector  Jonas  Mejares nagkanayon  nga  molanat  pa  og  semana, buwan  o  kaha  tuig  una  mopamatuod  ang  Simbahang  Katoliko  niini  nga  usa  gayud ka  milagro.

Kini  human  susiha  sa mga  kadagkoan  sa simbahan   ang  tanang  mga  anggulo  nga  magpamatuod  sa katinuoran  ug  kamatuoran  sa maong  milagro.

Miingon  si Rector  Mejares  nga  dili basta-basta  motuo  og  milagro  sa santos  ang  Vaticano  hangtud  nga  masuta  niini  ang  tanang  mga  kamatuoran  nga  may  milagro  nga  nahitabo  sa  usa ka santos.

Kining  maong  pamahayag  may  labot  sa mga  pangutana  nga  nadawat  ni  Rector  Mejares  kun  nakabalita  na  ba  kuno  siya  sa Senior Sto. Niño  nga  nakit-an  sa tulo  ka  mga  bata  sa Mactan  nga  nakigsulti  kanila.

 Si Rector  Mejares  miingon  nga  ang  Dios  daghan  kaayo  og  mga  kahibulongan  ug  milagro  nga  himoon, apan  ang  simbahang  Katoliko mangita  gayud  og  paagi  aron siksikon  ang  kamatuoran, unsay  nahitabo ug  nganong  ginganlan  kini  og  milagro.

Matud pa ni Rector Mejares  nga  sukit-sukiton  pa  sa  mga  kaparian  ang  tinubdan,  susihon  ang  dapit  nga  napalgan  ang  maong  santos. Dili gusto  ang  Vatican  nga  motuo  lang  dayon  sa  giingong  milagro  nga  walay  igong  basehanan.

Mo-interview  kini  og  mga  doktor, scientist, abogado, scholar  ug  uban  pa  kinsa makapasabot nganong  nagmilagro  ang  usa  ka  santos.

Unya  na  kini  aprobahi  sa  mga otoridad  Katoliko  kun  mapupos  na  ang  tanang  paagi  sa pagsusi  ug  mamatud-an  ang  kamatinud-anon  sa  mga  saksi, matud  pa ni  Rector Mejares.

Kun  kapamatud-an  na usab  ang  kagamhanan  niini  pinaagi  sa daghang  nangaayo  nga  gimilagrohan, dan  anha  na  diha  ilhon  ang  kamilagroso  sa maong  santos  nga  ilhon  sa Simbahang  Katoliko  sa tibuok  kalibotan. (BANAT NEWS)