Suspek sa kamatayon sa Australiano ikiha
CEBU, Philippines - Gitakdang pasakaan og kaso nga homicide karong adlawa ang usa ka babaye nga giingong “boringâ€(nagbaligya sa dungog) nga nakapatay sa usa ka Australian national didto sa sitio Humay-Humay sa barangay Pajo, dakbayan sa Lapu-Lapu niadtong Sabado sa gabii.
Ang biktima mao si Rodny Kim Chambers hingkod, nga temporaryong nagpuyo sa apartment sa Humay-Humay.
Si PO3 John Carlo Jocotan sa homicide section sa kapolisan sa Lapu-Lapu City Police Office (LLCPO) nagkanayon nga ila na nga giandam ang kaso batok sa maong babaye, kansang ngalan gipugngan pa nila. Nadakpan ang maong suspek ug gibalhug dayon sa kapolisan sa ilang prisohan.
Dugang pa ni PO3 Jocotan nga nagsugod na karon ang ilang buhatan sa pagkuha og mga saksi sa pipila ka mga molupyo sa maong dapit nga giingon nga maoy nakakita sa maong hitabo sa pagpalig-on sa kaso nga ilang ipasaka batok sa maong suspetsado.
Miingon si PO3 Jocotan nga gaan-gaan ang kaso nga ilang ipasaka sa maong babaye tungod kay sa imbestigasyon nga ilang gihimo ilang nasuta nga wala planoha ang maong krimin.
Matud pa niya nga ang pagkamatay nahitabo dihang wala mobayad ang biktima sa ilang gikasabotang kantidad.
Naglalis ang suspek ug ang biktima unya gipatiran niini ang suspek, apan wala siya makapanimbang sa lawas hinungdan nga siya natumba.
Apan giingong naparok ang ulo niini sa sira sa pultahan ug namatay dihadiha. (BANAT NEWS)
- Latest
